 La kvin brutoj en la stalo, ĉe la domo de l' bieno estas bovo kaj ĉevalo, ŝafo, kapro kaj azeno. |
 Meleagro kaj ansero, koko kaj anas', kun ravo, eksilentas je l' apero de la multkolora pavo. |
 Birdoj flugas. Fiŝoj naĝas. Rampas vermo kaj serpento. En velŝipo hom' vojaĝas je la blovo de la vento. |
 En la cirko, sen punbato, kun dresisto ludas foko... urso estas akrobato... kaj sur hundo rajdas koko. |
 En pejzaĝ' kun monda famo, en river' nomata Nilo, banas sin hipopotamo, rinocer' kaj krokodilo. |
 Ĉasas indiĝena viro en brazila praarbaro. Ne timigas lin tapiro, nek boa', nek jaguaro. |
 El flugbirdoj la plej grandaj estas certe la kondoroj. Ljamo, en altaĵoj Andaj, vidas ilin en la foroj. |
 La giganto de l' arbaro estas ja la elefanto, sed baleno, en la maro, pli ol ĝi estas giganto. |
 La simioj estas bestoj kun plej granda hom-similo... Aŭdus tion kun protestoj la ĉimpanzo kaj l' gorilo. |
 Por defendo de l' histrikoj, de la polpoj kaj putoroj, estas inkoj, pinglaj pikoj, ĵetoj de malbonodoroj. |
 Se formikoj estas plagoj por plantej' laŭ niaj spertoj, vivu la mirmekofagoj, la dazipoj kaj lacertoj! |
 Ĉiam zorgu pri abelo kun atento kaj trankvilo. Ju pli dolĉa la mielo, des pli vunda la pikilo. |
 Bedaŭrante la destinon, muŝo krias: "Ve! Ho, ve!" Antaŭvidas tujan finon en la buŝ' de arane'. |
 El trueto, kun kuraĝo, mus' aperas, sub la luno. Kuras rekte al fromaĝo, kaj la kat' al ĝi, por puno. |
 Lup' ululas... ho! teruro! Vulpo rabas la kaptitojn en kokej'... kaj, sur la muro, geko manĝas la moskitojn. |
 Se leon', sen vol' aŭ plaĉo, irus al Azi', en migro, tie estus ĝi bestaĉo, kaj la reĝo estus tigro. |
 La papago ne parolas: nur ripetas, sen kompreno. Sed la homoj nun kontrolas komunikon de delfeno. |
 Loĝaj dramoj kaj komplikoj ofte trafas multajn homojn, sed mituloj kaj helikoj ne forlasas siajn domojn. |
 Estas belaj: la koloroj de ara' kaj papilio, kolibretoj apud floroj, kaj la voĉ' de kanario. |
 Blankaj cignoj naĝas bele sur lageto, ĉe la maro... Ŝvebas mevoj surĉiele, kaj alflugas hirundaro. |
 Estu ne nur en muzeoj la belaĵoj de l' naturo: Vivu la paradizeoj, la fazanoj kaj l' menuro! |
 Tamen ankaŭ estas hido: en la porkoj kaj skaraboj, en serpento kaj akrido... ratoj, blatoj, kankroj, kraboj... |
 La veneno de krotalo, skolopendro kaj skorpi', pli ol hufoj de ĉevalo havas da danĝer' por ni. |
 Forremante el la kajo, restu firme en la barko! Fuĝu de l' vosto de l' rajo kaj de l' dentoj de la ŝarko! |
 - Ĉio sekvas saĝan planon... Ĵetu for senkaŭzan timon! Cikoni' portas infanon kaj anĝel' portas animon! |
 - Vidu la rapidajn kurojn! Kaj la koloj ankaŭ samas! - Sed la strut' havas du krurojn, kaj nur la ĝirafo mamas... |
 En rilato al la falko agloj estas ja enormaj... Kornoj de la cerv' kaj alko estas iom malsamformaj. |
 Krom la fiŝoj, en la maroj estas granda best-vari': salikokoj kaj omaroj estas ja frandaĵ' por ni. |
 Kun rapido kaj kun fido gaje saltas bestoj du: estas ja kanguruido en la poŝ' de l' kanguru'. |
 Por noktua belulino rigardanta tra-fenestre la vesperto, kun fascino, serenadis muzikestre. |
 Ran' kaj bufo, unutone, kantis base, dum la gril' akompanis violone... kaj cikado, per fajfil'. |
 La lampiroj, el la foro, venis, ĉiu kun kandelo. Kaj kuniklo kaj leporo kriis: "Kiel granda belo!" |
 Famaj estas: vulpaj feloj, plumaj liroj de menuroj... kaj la ĝiboj de kameloj, kaj la vostoj de sciuroj, |
 kaj la frakoj de pingvenoj, kaj la beko de tukano, kaj la grando de balenoj, kaj l' bekpoŝ' de pelikano... |
 super la mortint' - vulturo... apud la mortint' - ŝakalo... en testud' - kirasa duro... kaj klakilo en krotalo... |
 silko de la raŭp' japana... de la drak' - la fajra vomo... kaj la vivo malhumana kaj malsaga de la homo... |
 nigra-blankaj zebraj strioj, mort' heroa de kobajo, multkolor' de papilio kaj la vosta vip' de rajo... |
 la okuloj de la linko kaj l' oreloj de l' azeno... beko de ornitorinko... hida bleko de hieno... |
 la bekpiko de la pego en konstanta ligna boro, la konstrua laborego de formiko kaj kastoro... |
 de la ŝafo - multa lano, de l' abelo - la mielo... ĉio, ŝajne, laŭ la plano kaj l' ordono de l' ĉielo. |
Versoj kaj Direktado: Sylla Chaves.
Bildoj: Karlo Teodoro (Paulo José).
Voĉoj: Jaqueline Tergolina, Joel Manso,
Paulo Sergio Vianna, Sylla Chaves kaj Zillah Chaves.
BEL - Brazila Esperanto-Ligo. Rio de Janeiro. Brazilo.
MP3-Dosiero: 9690 KBajtoj.